НЕКОТОРЫЕ ОСНОВЫ УЧЕНИЯ СТАРООБРЯДЦЕВ СТАРОПОМОРЦЕВ

[Belsiger]

Глава 12
О сем яко подобает твердо и крепко во святей вере стояти, а раскольников и раздорников никакоже слушати
О сем подобает ведати всем православным християном, паче всех нужнеиших и полезнеиших дел духовных жития. Яко довлеет весма великую и твердую крепость имети, во благочестивеи святеи православнеи християнстей вере и никакоже колебатися разумом и своим смышлением, ни семо ни овамо, несть сия погибели горше и лютеише, еже своему мнению и разуму последовати. Во истину бо по Писанию, несть тои християнин, но еретик наречется, яко же глаголет Святое Благовестие: «Не по Писанию мудрствующии вси еретицы: и паки, аще кто мнению своему крепце прилепляется, тои еретик есть. А паче блюстися и весьма опасатися подобает от раздорников и раскольников веры Христовы, ни о чем их не слушати и не вопрошати. Аще ли же очесом и сомнение случится бытии, не вопрошаи раздорников и раскольников церковных, но вопроси отцы твои и возвестят тебе и старцы твоя рекут тебе, а раскольников и раздорников не вопрошати, и в домы своя их не пущати.
Яко же глаголет возлюбленныи Иоанн Богослов (в послании 2) и аще кто грядет к вам и сего учения не приносит, не приемлете его в дом свои. И радоватися ему не глаголите: глаголяи бо ему радоватися сообщается делом его злым. Понеже сеи непребывает во учении Христове того ради и Бога в себе не имут. Яко же глаголет тои же апостол Иоанн Богослов: всяк преступаяи и не пребываяи во учении Христове Бога не имать. Тако же и Христово Слово всегда в разуме подобает имети глаголемое сице: «Аще рекут вам, се зде Христос или он де не имите веры, и аще в пустыни не изыдите, того ради и паки глаголет: яко восстанут мнози лжехристы и лжепророцы и лжеучители». И сосуд избранныи Павел глаголет: «Яко из вас самих восстанут мужие глаголющие развращенныя». Апостол же Июда в предисловии послания своего о таковых заповедает: «И изгонити повелевает яко лестца и заповедает верным ни едино имети общение с таковыми». И ниже паки глаголет: «Подобает убо от таковых отлучатися».
Апостол же Павел увещевает и молит всех глаголя сице: «молю вы братие блюдитеся от творящих распри и раздоры, чрез учение ему же вы научистеся» и паки: «блюдитеся от псов, блюдитеся от злых делателей, блюдитеся от сечения неверных. Тем же и паки глаголет (Зачало 377): «Братие стоите и держите Предание имже научистеся». Конечное же и зело страшное запрещение паки сказует: «Но аще мы или ангел благовестит вам паче еже благовестихом - анафема да будет. Еще же подобает и сего блюстися еже к таковым раздорникам никако же в домы их входити. Сице заповедает святыи апостол к Тимофею пиша глаголет, а паче же рещи ко всем верным сице глаголя (Зачало 378): «Да запретиши некоим неходити ко иным учителем, ниже внимати баснем и родословием безконечным, яже и стязания паче творят, а не Божие строение еже в вере понеже и раздорницы». Тако и по Святому Писанию (Зачало 121): «Благими словесы и благословением прельщают сердца незлобливых». И паки, нечествующии покажутся яко благочествующии воистину бо прииде время самое то, о нем же рече паки апостол, будет бо время, егда здраваго учения не послушают, но по своих похотех изберут себе учителей чешеми слухом отвратят и к басням уклонятся.
И паки: «Аз бо веем се яко по отшествии моем внидут волцы тяжцы в вас не щадящее стада». И сего ради подобает всячески от таковых удалятися и от бегати, яко от ядовитаго змия или огня паляща. Сего ради зело страшно и Божественный Златоуст о раздорницех глаголет: «Яко и кровь мученическая сего греха загладити не может, а сомнящагося в вере Писание уподобляет волнению морскому. И паки: «Муж двоедушен неисправлен во всех путех своих. В правду убо яко от сего ражаются еретики. Зри убо еже о Арии и Нестории и Оригени и прочих еретицех. Не быша ли исперва вси православнии до начинания злаго мудрования своего.
И егда не покоришася собором святых отец, тогда сотворишися начальнии и все презлобнии еретицы (беседа лист 392) не разумеющее бо правды Божия, и свою правду ищуще поставити. Правде Божией не повинующееся поистине убо муж безсовестен сам себе – ратник и убиица (Беседа Лист 368). На вернаго же и опасно внимающаго Божиим Законам, ни человек ни бес ниже ино, что противу стати возможет, сего ради и мы потщимся святоотеческая предания хранити и блюсти себе опасно и совет готовыи восем себе прелагати, понеже по Писанию, во многом совете спасение бывает. И всяко брещися от расколотворителей и раздорников Святыя Церкви. Аще же кто повинется им, и ты убо (по Писанию) инех погибели виновен будеши и лютейшая постраждеши от иже запеньшихся с тобою и приведеши в погибель и сего ради блюдемся опасно.

 

[Belsiger]

Глава 13
О сем яко не подобает много мудрствовати об Антихристе
Понеже Писание Святое много о Антихристе, и различное видение описует, и зело премудро и многому разсуждению потреба, но точию спорити и раздор чинити о том много не подобает. Аще кто во прении глаголет о сем яко будет чувственно и вся деяния его и видения скажет, то и мы с таковыми много не спорим и в злобу не входим, но точию спросити его долженствует: о рождении его, и о стране, и о граде, и о родителех, и о имени, и о возрасте, и о действе, и о седании на месте святем, и о взятии Образа Божия и уподоблении Христове. И о всех сих таинах по единому разстоянию и покоем же особь вопросити достоит, но и се от любве точию глаголати с таковым, а злобою спорить не подобает, понеже сей человек разума не имат в себе совершенна.
И аще кто чувственно его ожидает, сей духовного разсуждения не сподобится получити, ибо аще в правду чувственно будет, но мы аще не увидим, но услышим где будет пребывати. Аще ли же и чувственно не имать бытии, то надежду имеем и без сего мудрования спасение от Господа Бога получити. Аще бо святи многопокровенно и зело хитро о нем сказуют, и Таину сию явьстенно и просто тако не открывают еже в конец чисто разумети, но точию се сказуют: «Иже кто имать разум, да чтет число зверино», и прочая многая и иная премудростию тако сказует. Нам же се паче подобает внимати, понеже нам несут сия нужная Таина, ибо и без испытания многаго, еже о сей таине спастися возможно. Аще бо и святи известно и испытано ведяху - тии Божествении мужие, но покровенно и зело премудро и ужасно видение предлагаху. Того ради яко не есть нужнейшая вещь, но и сосуд избранный Божественный Павел с толкованием Великаго Златоуста. И паче о сем молчати повелевает и не полезных искати воспрещает. Сице пиша сказует: (Беседа лист 2982) «Не оставил бы убо сия еже о Антихристе, аще полезныя быша была то не убо о сем взыскуем». И ниже паки глаголет: «Мнози ищут рече, где преложися Енох, и почто преложися. Ниже сия бо не оставляют не ведети дня знамения сущаго самаго пришествия. К сим же паки о Илии и Енохе ответ творя тако глаголет: «Но излишние есть еже всячески сих искати». Того ради и мы молимся Господу, еже точию просветити очи наши, да некогда уснем в смерть. Тако же и вашу братскую любовь просим и молим еже о сем не искати, и нас тупоумных и грубых о сем не пытати.
Того ради и святии запретители о сем глаголют. Яко же глаголет преподобный Ефрем: «А имущему ум в вещех жития сего и любящим земная, не разумно се будет». Нам же довлеет едину точию веру во Христа имети, и заповеди Господни прилежно хранити. Аще ли же кто претися будет о сем, еже уведети в конец и тои да сматряет святыя книги, с велием разсуждением и с советом братским. Златоуста и Ипполита и Иренея и Месии Правдиваго, и Апокалипсис и Златый бисер и Новосолодорион, и Беседы Апостольские и Хрисомологион, и торжественник и в слове Иоанна Богослова и преподобнаго Ефрема Сирина и Соборник малой, и в Слове Зиновиевомом, и аще кто сия вся книги со испытанием и со благословением древних отец и настоящих и с братским советом.
Вся сия да сматряет, и с молением ко Всесильному Богу в разум да придет, и той да увесть сказанная святым, а своему мнению никакоже последовати, но внимати писанным и отеческаго благословения, и братскаго совета держатися, и тако надежду свою на Бога возлагати, а мудрование свое ни в чем не имети, а разсуждению отеческому всяко последовати подобает духовно, сиречь: Видимо и невидимо. Невидимо разумеваем по Писанию, яко обладал есть всею Вселенною, и грады и монастыри и вся церкви и весь священный чин и вся таины и всякое действо. Яко же глаголет Писание: возмет образ истиннаго пастыря, и прельстит весь мир в смерть, и во всем хощет уподобитися льстец Сыну Божию и прочая о нем Писания тако по духовному разсуждает. Видимо же льстит учит принуждает, стесняет изгоняет и безчисленная и иная томления наводит. Яко же рече и паки Писание: томя и муча весь род человеческий без милости. Многа же глаголати о сем престанем, и много мудрствовати не можем, но в судьбы Господни полагаем.

 

[Belsiger]

Глава 14
О сем яко не подобает своему мнению последовати
Еще же подобает всем хотящим спастися и в разуме истеннем пребывати изволяющим не своему мнению или разсуждению внимати, но последовати святоотеческому писанию, и святоправильному разсуждению. К сему же и Отец наших прежде бывших и настоящих. И всея о Христе братии совокупленным и согласным со Святым Писанием разуму, а не своей воли последовати, воля бо наша, якоже Авва Дорофей глаголет: «Медяна стена стоит бо между нами и Бога». Ибо о сем чти тамо пространние в поучении святаго и уразумееши силу реченнаго сказания, и прими в разуме своем страшное поведание, и ужасти многия и исполненное.
Тако бо подобно Максим Грек сказует страшно о сем (Глава 78). Еже мнению своему последовати, сице глаголя: «Еретик есть, кто мнению своему крепце прилепляется, но и Благовествование Святое тоже поучает глаголя: «Не по Писанию мудрствующие вси еретицы. И Божественный Златоуст согласно с сим свидетельствует: (Беседа лист 386) «Горе мудрым о себе самим бытии аще и мудр будеши иного требовати подобает, аще ли мнишися не требовати, безумнейши всех был еси и немощнейши». К сим же всем и ини мнози святии о сем многое и страшное запрещение полагают, еже мнению своему, никакоже последовати, и во всем волю свою отсекати. (Преподобный Дорофей) тогда о видеть кто Путь Божии не имущь порока егда оставит свою волю. Егда же повинется своей воле, не видит непорочный путь Божии, но аще, что убо услышит о утверждении, абие порицает и оплевает и отвращается и вопреки биет. Како бо имать стерпети кого, или повинутися, коему любо совету держаи свою волю, того ради соблюдатися опасно подобает, еже от себе что мудроствовати, и писания не согласныя со Святым Писанием производити. И в человеки в том поучати, сие бо зело пагубно есть душам християнским и вредительно. Аще ли же по согласию и соединению святыя веры и Божия Закона и всего Богопреданнаго Святаго и Божественнаго Писания, пишет кто или глаголет, или поучает согласно и во всем соединено.
Сице убо сей не совращает душ християнских не повреждает, но паче укрепляет и на подвиг Святыя Веры подвизает. Яко же Блаженная Мати Иякова Персянина, слыша сына своего отпадша от веры и устрашися зело. И посла к нему просительное и увещательное и согласное Святым Писанием послание, и тем сотвори Сына своего, не токмо отвратишася от нечестия, но пострадати изволиша за истинное благочестие Богом преданнаго. Тако и всем в правоверии пребывающим еже от себе что писати или поучати не возбраняем ни како же, но точию согласно было бы с Божественными Словесы Святаго Писания. Но исперва мнози святии прости быша и невежди и пастуси, многих обрящяху и крещяху и заповедем Христовым поучахуся и согласно святей вере, а не свои разум составляху еже на разврат истинны, но по согласию Святыя Церкве и по разуму Святаго и Божественнаго Писания, а своему мнению не последоваху от святых ни кто же и волю свою не совершаху, но благословения отеческаго и братскаго совета крепко держахуся и нам повелеша в том же разуме пребывати.

 

[Belsiger]

Глава 15
О исповедании и покаянии грехов
Без покаяния и исповедания тако же ни единаго лета не пребывати. И аще кто тако хотя лето едино без исповедания пребудет, сей велию казнь приимет церковную, яко же глаголет Писание: Зинарь, Правило 90. Максим Грек Слово 38, Златоуст слово 16 и 17. О вере лист 114, Пролог марта 31, Кормчая Лист 581, 608. И Кирилова книга 303, и Никон Черной горы слово 21, Соборник Лист167 и Беседы лист 2983. Катихизис глава 35, и во инех Писаниях Божественных, весьма страшно и ужасно запрещение на отлагаемыя сказует. Яко же глаголет Никон Черногорский слово 51: «Аще прегрешением прегрешит человек в грех впадет, изнурит плоть тела своего и истает кости мозгов своих в посте и печали, ничто же успеет. Аще изречет к человеку грехи своя на срам себе, сего ради оправдится».
Тако же и лествечник сказует глаголя: (Лист 68) «Не бо есть без срама, срама гознути, обнажая обнажи своя струпы врачю, рцы и не срамися». Тако же и в беседех (Лист 3089) подобно глаголет: «Зане грехи не исповеданы, откровенны будут всей Вселенней и пред други и враги и ангелы, и паки тоиже глаголет: «Покаяние кроме отходящих лучше бе не родитися». Четырежде летом подобает исповедатися, аще могут и частее благоговении могут, и никто же паки тако не да не имеет того, который бо не имеет ни единою летом исповедатися, таковый ибо под клятвою и отлучением от церкви. И паки (Потребник Большой лист 148). Аще убо християнин без покаяния умрет, то не достоит над ним Иерею Пети, ни приношения зань принести, яко не исполнил закона Божия и веры християнския. О сем никтоже да не смущается, яко простому человеку каятися.
Не просто бо нам повеление положися, понеже о сем многая свидетельства святых сказуют: Номоканон Лист 72, и Большой Потребник Лист 730. «Аще убо кто есть священник не искусен же, а другии не священник, искусен же имея духовнаго деяния сему паче священника праведно есть помышления приимати и правильно исправляти. Сему повелению подобно и инии мнози святии согласуют и Анастасии Синайский слово 16, и Максим Грек Слово 38 и Кормчая лист 581 Глава 61. Зри о сем вышереченная главы и сказания к сим согласно свидетельствуют и друзии святии: Гавриил Филадельфийский, и в Бытии Глава 4, и в Минеи Чети Февраля 10 и Марта 12 и Мая 9 и Захарий Копыстенский яснейшее паче инех святых о сем сказует во Главе 36. Зри о сем тамо пространно такоже и епитемейник во Главе 11 глаголет: «Яко подобает кающемуся в таине своя согрешения человек человеку исповедаяся не яко человеку, но яко самому Богу, исповедаяися брату» и полевая речь, тако же сказует, еже подобает исповедатися друг другу. А в беседах Апостольских на листе 3023 брата же зде глаголет всякаго простовернаго, а не инока. Сего ради аз смиренныи и грешный молю и припадаю ко всем в православии пребывающим, не отлагаите покаяния к смерти, но очищайте свои души елико в животе сем пребывающее, бойтеся паче смертнаго часа повсечасно, грехи своя начастне со всеусердием исповедайте.

 

[Belsiger]

Глава 16
О сем яко не подобает отлагати время познавшим веру праву. Такоже и грешнику никако же неотлагати до инаго времени, но приходити скоро ко исправлению
К сим же и еще многим усердием молим и просим вся человеки Слово Божие и хотящеи спастися и в разум истинныи приити, и вечных и грозных мук убежати, то скоро не отложно да приходят к вере благочестивей. Будите подобни Корнилию праведному бывшему сотнику, и не ведущему не мало о вере святей. Егда появлению ангелову, прииде апостол Петр в дом его, и тогда Корнилий скоро и неотложно прият благочестие и святое крещение. Тако и евнух Кондакии царицы от Филиппа апостола научився и не отложи царских дел нимало время приятии крещения ради. Сего ради и прославишася от Бога славою не тленною. Тако подобает сим ревновати и всем человеком хотящим спастися.
О сем бо научает нас Святое Писание, сице глаголет: «Горе (рече) оному человеку иже ведыи закон Божий и отлагает время еже приятии крещение, ради своих прелестных и погибельных дел и сует, иже богатства ради и прибытка земнаго, ов же лености ради поста и молитв, ов юности ради и здравия, воистину сии сугубу и велику и зело тяжку казнь примут и горьку муку наследуют, паче не ведевших закона Божия. Тои бо не ведыи ни мало ни много еже о законе Божии, биен будет (по Господню Словеси) мало, а еже ведыи волю Господа Своего и не сотворив, биен будет много. Есть же ныне в мире мнози безумнии и несмыслении человецы, глаголюще сице, Дияволом научени: «Яко приведи мя Бог при смерти прияти крещение». Оле горькаго и злаго сего совета Сатанина, яко научи человеки сей лютои погибели, и не помнят сии и не внимают словесем Господним, глаголющим сице: «Будите готови на всяк час, яко не вестив кии час Господь Ваш приидет».
Аще же и приимет кто от таковых человек крещение, во истинну бо не вольное, понеже пости же смерть, аще бо не постигла смерть, то бы еще работал суете мира сего и Дияволу угодие сотворил бы кто. Бо и посему времени не поработавыи Господину своему год, и что может взятии у Господина нечто, но точию безчестие и гнев и биение и прогнание. Добре убо о сих пиша, глаголет Григорий Богослов (Слово 12), понеже повелевает варившим ко крещению, ныне вскоре сие творити, глаголя: «Крестимся днесь, да не заутра принудимся, болезни нашедши, или иной беде, не медлим больше собирающее грехи». И что убо ждеши человече, воньже многажды ни помыслом своим будеши Господин. Многажды сотворяет огонь жегомый обезумление, егда и язык не может вещати спасения глагол – «Еже отрицаюся Сатаны и обещаюся Христу». Да не больши что глаголю, егда ни руку не можеши воздети на небо, ни на ногу стати, ни колену поклонити, но притеци убо к благодателю и ко крещению. Дондеже здрав еси телом и мыслию, дондеже ни инии владеют твоим благом, аще ли же не разумееши, тогда не крещение есть то крещение. Но просто омывание гробное телу токмо бывает, но ты сам ся помилуи, донде же от Ассирии пловеши в тишине жития и здрав будучи, боишися всяко смерти и потопления. И аще боишися всяко и крестишися восхити крещение здрав сыи, и не в болезни и не в печали, и не погреби талант умирающути.
Ныне время благоприятно, веща апостол, зовет и вопиет: «востани спяи и воскресни от мертвых и оживися крещением и просветишися» (Псалтырь Толковая. Псалом 79). Оживиши ны и Имя Твое призовем: «Господи Боже сил, обрати ны и просвети лице Твое и спасении будем». (Толкование Исихиево). Оживиши водою оживляющею крещением, тогда бо имя твое призовем от Христа християне нарицаеми. Тогда бо и «Отче наш» глаголати начинаем. Яко же глаголет Божественный Златоуст в нравоучении 25 – м: «Яко верным сия молитва, сиречь «Отче наш», и причина есть, и закони церковнии учат и молитвы. Не просвещенныи убо не может Отца нарицати Бога. Сему же подобно и Евангелие (неделя 6) свидетельствует. Тако и мы братие, не прежде убо можем Отца нарицати Бога. Дондеже аще в купели крещения и покаяния грехи омываем. Егда же отнуду взыдем лукавое оно время отложше, тогда глаголем «Отче наш иже еси на небесех».
Воистину бо по Писанию всуе труждаются безумнии и несмыслении сии человецы, иже ведают о Законе Божии, а в него не входят, а труд в молении и во псалмопении имеют. Но труд их и моление все погибает вотще, и указуют от безумнаго своего разума на праведнаго Корнилия, яко прежде крещения молитвы его и милостыня взыде пред Бога. Но тои не ведыи о вере не мало. Егда же услыша и законе Божии тогда и час един не отложи тако бытии, но скоро прииде в веру Христову. И не понадеяся на сие – яко молитва его и прежде крещения приятна бысть к Богу, но приложи веру к вере Христове. (От Пандока).
Воистину научает злому совету Диявол, еже отлагати крещение. И паки глаголет Писание о сицевых: (Меч Духовныи. Неделя 20) «Носители же сицеваго со умершим одра суть скверная вожделения и ласкания, удерживающая во гресе, сих же носителей есть четыре. Два греха предидущии, си есть: не соблюдение себе от зла и дружество со злыми, два же последующии: си есть – надежда долгаго живота и без покаянное упование не превелию милость Божию и паки рече: «Два бо потока дарова Бог на очищение всякому человеку, един поток – крещение, а вторый покаяние, точию неотложно сие стяжати, и апостол возбуждает на се, сице глаголя: «Востани спяи и воскресни от мертвых и оживися крещением».
Виждь убо како возставляет нас Господь от прелести и пагубы мирския обожих купно верных и неверных. Верных к покаянию, а неверных ко крещению и ко истинному познанию благочестия и к совершенному и чистому покаянию и не отложному от грех своих. Горе бо во истинну, горе отлагающему время, еже прияти веру и чистое покаяние. Яко же глаголет Писание: (Зерцало мирозрит. Часть 1, Глава 38) «Не закосни обратися ко Господу и не отлагаи день за день, ибо внезапу придет гнев его и паки: «почто отлагаеши ни единаго дня известна, и пожидаеши целаго лета. Не изнуряи молю тя всуе данное ти время» (Сирах 29). Не обещаваи себе долгаго живота, обещание лукавое многих погуби (Деяние 1). Не веси яко Отец положи во своеи области, а не в твоеи (Глава 39).
Почто убо отлагаеши покаяние, тако полезное, яко неудобь умолиши во время смертное, в нем же аще кто и много слезит, обаче веровати о нем яко страха ради адова сие творит, еже не оправдует человека. И паки: «Воспоминаи Творца своего во время юности Твоея. Дондеже не погубиши ума, а по истине бо, отлагающии бо время на покаяние (Книга Старчество) таковыя не сподобляются ему. И Божественный Златоуст к сим глаголет: (Беседа, Лист 1995) не приключимо и чуждо християнину, яко отрады и покоя искати и прилеплятися житию. О возлюблении будем вси готови, еже ожидати час смертныи.

 

[Belsiger]

Глава 17
О сем яко подобает всем православным християном кротость и смирение имети
Подобает же всякому православному християнину кротость имети и смирением украшатися, сам бо Господь учит нас глаголя: «Научитися от мене яко кроток есть и смирен сердцем и обрящете покои душам вашим». Сице бо и зрети на сицевая изволяя Владыка глаголя: «На кого воззрю, но на кроткаго и смиреннаго и трепещущаго моих словес, и блажени кротции яко тии наследят землю». Сице и Генадии патриарх научает всея православныя веры жителеи, глаголя: (Катихизис. Глава 31) «кротко седание, кроток взор, кротко слово, вся тебе сия да бывают». О сих бо истинныи християнин явишися. Глаголет бо Божественныи Златоуст (Беседа Лист 4): «Ничто же сладостнее и сладчаишее тихости и кротости и послушания, всем есть ключим таковыи. Ниже работы срамляются таковии ниже нищаго отбегают, ниже недужнаго и болящаго удаляются, всеми обладаем и всем добродетелем соделователь.
Тако же и Иоанн Лествичник наказует, глаголя: (Слово 29). Буди кроток и неревнитель о зле, прекословие несть жительство християнское и несть назнаменано во учении Христове, веселися с веселящимися (духовне), и плачися со плачущими, се бо есть знамение чистоты, с недужными недугуи, со грешники плачи, с кающимися порадуися, ни обличи кого, ниже поношаи. Аще ли любиши кротость буди в смирении, и аще сподобишися смирению, порадуюшися на всяко время. Сего ради подобает нам ныне кротким и смиренным и незлобивым бытии, времени ради сего страшнаго и ужаснаго, и человек ради в неведении пребывающих. Понеже не толико нас ругают и укоряют, но паче сего злеиши, яко веру нашу православную християнскую поносят и вельми всячески ругают. И сие от них поругание вере, а нашим душам погибель. Понеже нас ради вера хулима бывает, сего ради блюдем опасно и храним законоположение.

 

[Belsiger]

Глава 18
О сем яко подобает терпети скорби и болезни со благодарением
Еще же подобает в нынешнее многоплачевное последнее время со всеусердием многим и с любовию сердечною, всем православным християном в скорбех и в болезнех и лютых, а паче в напастех и бедах и в гонениих доблественно и крепко терпети Господа ради со благодарением, понеже за сие велико и неизреченно всерадостное воздаяние ждет таковые, а наипаче яко и с самими мученики и со страстотерпцы Христовым равну почесть и похвалу и венцы примут ибо о сем сказует Святое Писание (Беседа Лист 2024). Ничтоже онаго языка святеши, еже в злых благодарити Бога, воистину ничтоже мучеников отстоит. И паки глаголет: «Языка благодаряща ничтоже святеиши». Еще же и паки к сим многая Святая Писания о сем сказует, и поучает терпети скорби и болезни и напасти, и о сем нас понуждает и великои милости и благодати и радости небеснеи сподобляет. (Беседа на предисловие, на 2 послание к Тимофею). Аще и не Христа ради напасти приемлем, но обаче долготерпеливне носим, Бога ради нам терпение сие вменяет и паки (Беседа лист 68).
На вернаго же и опасно внимающим Божиим Законом, ни человек ни бес, ниже ино что противу стати возможет. Аще биение ли досаждение светлеши того сотворит пред Богоми и мученический венец приимет по истине убо светложитие праведных како же светится не терпением ли, претерпевыи же до конца, по Господню Словеси тои спасется, но священноинок Дорофей, слово 14, тако глаголет: «Понеже бо аще кто вдаст себе в повседневную скорбь и нужу Бога ради и таковаго с мученики венчает Бог, аще бо в подвизе Господни телеснее умирает кто, то и Господь таковаго венчает, и мощем его честь воздаст. Яко же честным мученикам.
Аще ли же скорби не имат, ни болезни, ни беды, ни печали, то подобает хотя мало на кииждо день прослезитися о своем спасении. (Священноинок Дорофей Слово 62). И аще случится онаго плачевнаго дня секретная кончина, и сего ради плача, еже о души своей. Вся грехи его прощени будут и сподоблен будет жизни вечныя. Тако бо Святое Писание нас научает и в разум спасительный приводит и наставляет.

 

[Belsiger]

Глава 19
О сем яко подобает страннолюбия держатися
Еще же подобает всем православным християном, а паче же в нынешнее нужное и гонительное последние время, страннолюбия держатися всею силою и всею крепостию, поминающее писанное в Законе Господни: «Всяк приемляи страннаго Христа приемлет в дом свои». И аще страннаго и пришельца в дому своем держит воистину Христа Господа имеет в дому своем. Тои бо сам глаголет благословенныма своима устнама, Христос Спас миру сице рече: «Странна мене приясте, и паки приемляи праведника во имя праведниче, мзду праведничю приемлет. Аще и несть праведника по Святому Евангелию, но приемлет его с любовию яко праведника, во истинну мзду праведничу приемлет. По Святому Писанию за приятие страннаго понеже сия нужды несть преболие в человецех. Кольми же паче в нынешнее самое то нужное и многоболезненное и всегонительное и многоплачевное время, понеже мнози ныне гонения ради презельнаго не имут где главы преклонити. Воистинну блажен и благословен будет Богом и преисполнен всякаго блага и Божия милости и велию мзду приимлет от Господа Бога, в сий век и в будущий и получит часть во Царствии Небеснем. Подобно убо в памяти имети и апостольское слово сице глаголемое: «Братолюбие возлюбите страннолюбие не забывайте таковыми жертвами угождати Богу. И прочая вся многая Святая Писания о сем великое похвале предлагает.

 

[Belsiger]

Глава 20
О сем яко не подобает злопомнения имети
Ибо и о сем глаголем всем в православии пребывающим, яко злопомнения подобает малого и великаго весма всяким образом боятися и страшитися. И на кийждо день себе стрещи и сматряти и в злобе не пребывати. И во гневе молитвы Господни не приносити. Сиречь не молитися, но первие прощение сотворити, и потом молитися. И аще ли кто не разрешится прощением и молитися тако начнет, и тои злопоминатель, не Богу приносит молитвы, но Дияволу. (Соборник Великий). И аще кто глаголет, и «Отче наш», то не Отца Небеснаго призывает и прославляет, но Отца Диявола. Сему же подобно и правила свидетельствуют – сице глаголюще (Номоканон Правило 123): «Аще кто имать вражду на кого в Церковь да не входит, ниже приносы его приемлются, дондеже смирится, ибо молитва его (злобнаго) в грех вменяется. Да творит же поклонов 50 на всяк день (колико дней во злобе пребывает). Тако же и Зинарь глаголет (Правило 111): «Памятозлобник да покается лето едино, поклонов по 12». Сим же подобная и ина многая Священная Правила с крепостию гласа свидетельства предлагают страшно и зело ужасно. Божественный Златоуст глаголет (Соборник Большой): «Сердитыи человек храмина бесовская, а злопомнительныи весь дом Сатанин, сего ради подобает зело опасно блюсти и хранити от всякия ненависти и гнева и памятозлобия понеже великия и страшныя и грозныя муки ожидают того человека. Убоимся убо сего и мы. О возлюбленная о Христе братия, ради горкаго и лютаго и всеужаснаго смертнаго посечения и страшнаго онаго вечнаго мучения.

 

[Belsiger]

Глава 21
О оскверненных от гадов сосудех молитися
Тако же блюсти подобает всякий сосуд, с чем любо не есть, поставлено где покрыяти твердо с молитвою Исусовою. И аще некако ключитися впасти некоему гаду, священная бо правила тако о сих являет (Зинарь Правило 75) Аще ли что вино впадет или во ино что, аще нечто обрящется, да измется и да придет Иерей и освятит его, аще ли вкоснет дондеже начнет гнити в нем другаго дни, тогда прелиет и во ин сосуд чист да освятит иерей. Аще ли будет, дондеже изгниет то недостоит вкусити, но да пролиется на землю все и сосуд да разбиется. Нам же тако же сего ради времени, ин устав разсуждением отеческим положен есть, понеже ныне не имеем мы иерейского освящения тако же за первое действо, аще прилучится во что впасти на скоре да имзется тои нечистыи гад и во ин сосуд чистыи да прелиется, и помолитися подобает 3 вервицы за сосуд и за преливаемое поясными поклонами аще ли начнет гнити, то нечистое, тако же да измется скоро, и оное питие или брашно да прелиется во ин сосуд, прежде покаженныи и тако поставити обоя сосуды и помолитися 5 вервиц в место молитв иерейских и покадити обое купно ястие и сосуды, и тако со знамением крестным и со благословением ясти то брашно во уреченное время. Аще ли начнет весма гнити, то все опроврещи на землю, или псом или скотом на снедение, но точию се всегда помнити, еже аще что случится брашно и питие или ино что пригодится поставити и взятии, или ино что делати и путь шествовати или пищи или питие устрояти вся с разсмотрением и чистотою и с благословением и с чистыми и умовенными рукама, а паче всего с молитвою Исусовою вся да устрояются тако, но точию смотрети часто на поставляемое брашно и покрывати крепко.

 

[Belsiger]

Глава 22
О сосудех их же подобает хранити от рук еретических
Сосуды своя всем християном подобает хранити от мирских рук, еже бы им не прикасатися никакоже, и аще кто любо прикоснется к сосуду или к брашну, аще ли сосуд, подобает измывши помолитися за него. Тако и за брашно прикосновенное от еретик и тако ясти.
Яко же ос сем глаголют священная правила, и не точию тако просто сие попущати, но весма блюстися подобает, якоже пишет (Матфей Иеросалимский. Правило 50), но аще кто осквернит рукою своею етер вино или масло или нечто от таковых, не достоит християном вкушати. Но священник придет и освятит е, и посем вкушати от него. Тако же подобно и Зинарь (Глава 76) Глаголет: не повелевает никаже ясти тако просто без освящения иерейскаго. Подобно и Феодосий преподобный ко Изяславу князю сице глаголет: после осквернения еретических рук молитву сосуду дати. А святый Кирилл Иерусалимский на листе 369 глаголет. Аще арминин и християнин на пути в купе, а чаша будет едина, и аще прежде испиет из нея арминин, то християнину из нея не пити, а сосуду молитву не давати.
Видиши ли крепость святых, како укрепляют и утверждают нас еже не смешиватися с еретики, но чисто верных от неверных разделяху и в житии и в ядении и в питии. Сим же подобно и в житии преподобномученника, сице глаголет: гнушахубося святии еретиками и не взимаху ничтоже от рук еретических.
Ныне же видим многих имеющих християнскую веру и преобидивих Божественная правила и Святых Отец повеления, и Древних Отец наших наказания. Преобидевших и отмещущих ини во что их запрещение и поучение полагающих, купно с неверными. И из рук пиющих и ядущих и греха в том не вменяющих и ни во что полагающих. И из их сосудов яко из чистых в своя сосуды влагающих и ядущих безбоязни, и много же паче твердых и крепких в вере укоряющих и смеющихся над ними, нецыи же и паче сего весма согрешают яко и вельми душу свою погубляют и в самую еретическую прелесть впадают, и на скверныя их кабаки ходят, и похоть свою плотьскую и нечистоту скверную исполняют. И из тех скверных и нечистых сосудов испивают. Посеем паки не убоявшееся Господа Бога и с християны купно сообщаются и сквернят их своею нечистотою.
Воистину праведно о сих глаголет Божественный Златоуст (Маргарит. О лжеучителях). Услышите вси иже с еретики вкупе ядущии, болезненнаго сего ответа, яко Вы Христовы врази быша. Иже врагом Царевым друг есть, сей не может друг Царев бытии, и жити недостоин есть, но со враги погибнет и горшаа подимет. Тем же не забываи сих прещении, сему же подобно Зинарь глаголет: «Иже со арминином кто ясть, или с павликианином или со инеем еретиком каковым любо, аще и паче любовь имеет кто ли, таковым ему же глаголет, да оставится того и приходит к Церкви чисте. Аще неведением се сотворил есть, да освятит его иерей, дав ему заповедь малую. Аще не послушает наказания, но хощит с ними ясти и пити, таковый со християны да не ясть и в Церковь не приемлется. Но отвращатися его яко идолослужителя.

 

[Belsiger]

Глава 23
О оскверненном кладезе како его освящати
Подобает же ведати исе всем православным християном, аще кто имеет у себе кладезь, смотрити и хранити его подобает. Аще что впадет или человек или скот или гад и о сем зри священная правила сице глаголющее : (Кормчая, Номоканон, Зинарь). Аще в кладезь ему же вода не истекает вон, и впадет гад вонь некии, и вдавится или скот, аще наскоре обрящется и вымет вон, да излиет воды тоя ведра три, паки всяк пиет от него. Сиречь от того кладезя. Аще ли един день обрящется в давленнныи скот или гад, да аще пребудет до два или три дни и потом измется вон. Да излиется воды тоя ведр 9, и да влиется вонь агиазма. Аще вскоре и внезапу очистит его. Аще ли пребудет много и гниет в нем да излиет из него ведр 40 и тогда придет иерей со освященством своим и возжет три свещи и окрест покадит, и речет молитву и освятит, тогда вси да пиют из него. Мы же ныне во многоскорбнем сем житии обретаемся и зело во многоплачевном понеже лишении иерейскаго освящения. И нужды ради сея великия творити повелеваем по разсуждению отеческому. Яко же нам простым человеком приличествует. За первое оскрвенение кладязю по преждереченному, по излиянию трех ведр, или колико кто хощет совести ради своея излитии воды и положити поклон 100 или 300 и покадити. За второе же осквернение, паки по преждереченному, по излиянии воды ведр 9 ли колико хощит, и полагает три вервицы, или более такоже с кажением. За третие же осквернение, по излиянии ведр 40, или всего кладязя, помолитися 5 вервиц тако же с кажением, и тако из него воду пити без сомнения. Тако же и новосотворенный кладязь, подобает канон молитися и покадити, и тако с молитвою и крестообразованием употребляти.

 

[Belsiger]

Глава 24
О сем яко подобает истово знаменатися крестным знамением
Подобает и се знати и ведати всякому православному християнину. Знамение крестное на лицы воображати истово и крестообразно. Первое сие знамение подобает знати и помнити и возлагати на главу прямо стоящему, а не наклонно главу имети (Сын Церковныи).
Тако бо нас и писание церковное научает. Ныне же видим многих молящихся главу еще не подымает прямо и знамением в ню ударяет. Не крест полагает на главу, но главу на крест наклоняет, и тако по воображению подимает главу и поклоняется. Сие бо есть зело неистово знамение показуется, понеже безглавен крест является. Тако и на левое плечо мнози полагают с поклонением, и сие такоже зело повредно есть знамение истинному и совершенному знамению.
Понеже Писание тако повелевает: первое вообразити совершенно стоя с молитвою Исусовою и тако поклонитися с последним сим словом молитвы – «помилуи мя грешнаго». Главу же подобает поклоняти низко, кроме старости или немощи великия до пояса нижайше. Сего ради по уставу и нарицаются поясныя. Аще кто не низко кланиется, лености ради и небрежения. И таковое поклонение леностное и нерадивое нарицается по Писанию махание. И таковому маханию воистину беси радуются (Сын Церковный. Глава 65).
Тако бо о сих Святое Писание свидетельствует, глаголя сице: «Сего ради внимаи себе о сем опасно. Что бы было все истово». Сие изображение: Первое о Троице, таже о двух естествах снития. Аще ли не тако воображаеши то не исповедуеши Святыя Троицы, ниже дву ествество в един состав снития исповедуеши. Тако и на челе главном и положение на перси. И аще кто не знаменует сего истово, то не исповедает Бога Слова воплощение. Тако же и направое плечо и левое, лености ради и небрежения не доносит руки своея, то не исповедует бытии судию живым и мертвым. Помни же себе и сие о Кресте, что бы ти было не платие на себе крестити, но тело свое, и сего ради крестом осеняешися. И прилагаи внятно руку свою, что бы ти на теле своем слышно было, а не на платие точию.
И аще кто исполнен крест по завещанию Святых Апостол и Святых Отец изображает на себе вельми сего беси боятся и трепещут и далече бежат от него. Аще же кто не истово изобразит его на себе, тому беси радуются, и всякою прелестию прельщают и смущают его. Тако во есть знамение живоноснаго Креста Господня, и тако со страхом и трепетом подобает начате знамение крестное воображати ко всякому делу. В нощи и во дни и на всяком месте начиная и кончавая дело и вставая и ложася и навсяк час помни себе о сем разумно и прележно и усердно.
И аще некогда и в пустую храмину внидеши не мози тако не прекрестившися до трижды в ней бытии. Егда же и страхование случится не где и место оно огради идеже видиши темность бесовскую во угле стоящую и тако сим знамением Христовым Креста Господня, всюду и везде и на всяком месте сохранен будеши. Молю убо возлюбленне сие знамение крестное всегда и на всяком месте и на всяком деле не забывати и не стыдитися человек внешних и не боятися врагов. Яко же глаголет Божественный Златоуст (нравоучение 54). Никто же убо да стыдится честными нашего спасения образы. И главизною благих ею же живем и ея же ради есмы, но яко венец сие да обносим Крест Христов. Ибо им вся совершаются яже по нас. Аще породится (креститися) треба будет, крест приходит, но точию молю вас, всю о Христе братию, сия вся реченная во Святом Писании не забывати.

 

[Belsiger]

Глава 25
Еже како подобает кадити. И како начало то есть седмь поклонов полагати
В кажении егда придет с кадилом кто любо от братии, то подобает со благословением духовным распростирати руце свои на приятие Благодати дара ради Духа Святаго, яко же глаголет Писание: Старчество и Сын Церковный. А не тако сие просто сотворити, яко же неции от обычая восприяша, а не от Писания. Неции же кресты вынимают и вземлют в три перста, друзии же крест на перси вынимают, а руки своя по бедрам вешают, но сие их мудрование зело противно Святому Писанию. А сие и наипаче, яко которыя в три перста, сиречь в щепоть берут крест, и возносят на кадило. Мы же сего и слышати не хощем, но взираем на Святое и Божественное Писание. Тако глаголет в Старчестве в великом и в среднем и в малом. Якоже писано есть в великом Старчестве: О видении святаго Ангела преподобному Пахомию. Сице глаголет: «а на соборном пении станет кадити, настоятель и ли поп или диякон, стати прямо и руки разкладывати и говорити: «Дух Твои благи наставит мя на землю праву, и Духа Твоего Святаго не отими от мене. Подобно и во иных Старчествах.
И Сын Церковный сему подобно глаголет: егда с фимиамом кадило приносится от иерея или от диякона или от настоятеля, тогда распростри руце свои и глаголи молитву Исусову и тако яко Дух жизни приимаи распростертием руку. Не инако како разумеем, но токмо взираем на Святыя Образа и на Пречистую Богоматерь и великаго Иоанна Предотечу.
К сему же праведных и всех святых како руце свои распростерты имущих пред Вседержителем Богом. И сие простирание святых рук приемлем во свидетельство, и посему Святому Писанию и научению. Еще же к сему взираем сюду и везде во святоотеческия книги и в Великом Уставе и Среднем и во Псалтыри следованном и Триодех Постной и Цветной и в Часослове и во Октаях и во иных святых книгах служебных. Не видихом нигдеже и не слышахом, еже кресты на рамех кадити, но всюду и везде повелеваем устав, братию кадити и по сему Святому научению и мы тако сотворяем, а от своего разуму или разсуждения и инако творити не смеем.
Еще же неции и начало полагают, и поклонов, а не вем откуду сеи устав восприяша, еже осмыи поклон полагати. И указуют от них мнози, яко бо во уставе и в Триоде постной, устав тако повелевает. А во уставе и в Триоде тако писано есть: Первое глаголет сице: «Боже милостив буди мне грешному» (поклон). «Создавый мя Господи и помилуи мя» (поклон). «Без числа согреших Господи прости мя» (поклон). «Достойно есть» и (поклон до земли). Таже «Слава и ныне», «Господи помилуи» дважды, «Господи благослови» и поклонов 3. Сице творим, а по «Достойне» поклон великий непременно.
Целующее на местех наших святыя иконы, и паки поклон един. Виждь зде речная уставом, яко подостойне поклон полагати и то не просто полагати, но по целовании святых икон и то не после «Слава и Ныне», но по Достойнее. И сии поклон «Ныне» восьмыи, не вем како и откуду ныне восприяша, но мы всюду и везде и в предисловиях псалтырных, выход Иосифа Патриарха. Такоже и в часословах, и в Сыне Церковнем, и во иных Писаниих сего не обретаем, а мнению своему последовати нехощем, но святоотеческому преданию внимаем, и соблюдаем опасно взаконение Святых Отец узаконоположивших нам сие творити.
А от себе что творити или приложити или отложити боимся церковная клятвы, понеже писано есть. Аще кто приложит или отложи, да будет проклят. И паки, не по Писанию мудрствующии вси еретицы. И паки, аще кто мнению своему крепце прилепляется, тои еретик есть. Того ради мы зело боимся еже что от себе что творити, а иных в том пребывающих не осуждаем и не зазираем, но точию от Святаго Писания устав всем сказуем. И мнению своему последовати не повелеваем, и разделу с ними сих ради не сотворяем, но яко же кто хощет, тако да пребывает и в Судьбы Господни полагаем.

 

[Belsiger]

Глава 26
О сем яко подобает святыя иконы в чистоте сохраняти и очищати
К сим же подобно есть и сие крепце помнити и содержати. Еже святая иконы в велицей чести имети и украшати, яко же возможно будет по силе. Сих на часте очищати и обметати и храмину ту чисту имети и сохранну от всякия нечистоты и праха, в неи же святыя иконы стоят. Понеже и домы християнския по Святому Писанию Церкви нарицаются. Яко же о сем глаголет Писание (Катихизис Великий).
И коегождо християнина дом Церковь наричится. И сего ради яко по согласию к сему чистоименному делу, еже глаголется о видемей Церкви, како ю подобает чисту имети и пометену. (Зинарь). Аще которыи священник, не пометает и не украшает Церкви Божия, да извержется от сана. Сего ради и нам боятися подобает, сего же церковнаго гласа глаголющаго: «Аще у нас убо и несть Церкви видимыя нужд ради наших безконечных, единаче идеже иконы святыя поставляемы бывают, ту елико по силе нашеи». И славословие Божие совершается, и тои храм чисто блюсти подобает. Тако же тому же церковному просвещению и мы последователи явимся и часть оную получити потщимся, понеже вся наша радость и веселие ту есть, идеже святыя иконы и славословие Божие, хотя мало совершается, а более сея радости ничто же не имамы, но просим и молим Премилостиваго Бога, дабы хотя сию самую малейшию радость противу Церкви Божия не отъял бы от нас Господь своим милосердием.

 

[Belsiger]

Устав
Чин оглашения входящим в Православную веру

Оглашение исправлено и дополнено сочленами Преображенскаго кладбища противу «Польскаго Устава» во время управления Преображенским кладбищем И.А. Ковылина

Святый Апостол Павел, в правиле первом повелевает испытати житие и нрав, сиречь свободный или раб, торгующий ли, или паки земледелец, и кое либо орудие имеет и прочая.

1. Аще купечеством питается, требуется распрашивати накрепко: не торгует ли чем противным закону християнскому, яко то, гудками, и прочими игральными орудиями, табаком, картами, или покупает что в ведении краденое, или что гражданским законом воспрещенное, яко без платежа пошлин и прочее подобное тому, ни самому творити, ни иному кому в том помогати, которое все, не токмо християнской вере препону творит, но и гражданскую честь помрачает, а душевное спасение весьма искореняет.

И еще не корчемствует-ли, или содержа неподобныя и распутныя лицы женския, и от того гнуснаго дела пользуется.

Ибо всего того хотящему пряти православие, вседушно отвергатися подобает, да не подпадет, кто либо християнин, под апостольское запрещение, еже глаголет: вами Имя Божие во языцех хулится.

Еще же назабвенно извопрошати накрепко всех приходящих в православие: не человеческих ли ради каковых приобретений приходит. Не долга ли ради, или чести, или каковаго либо приобретения, или пропитания, или другаго каковаго неотставления. Не имеет ли у себе каких неправедных приобретений, чуждаго имения – каковаго бы случая ни было, весьма советовать: дабы возвратил, и обиженнаго им удовлетворил, а у себе не держал. Ибо вера християнская злодеянию не помогает, но паче отревает и охуждает, и повинна творит большим грехом. Понеже таковый хощет во свете приобрести тму и погибель, а не спасение. И аще все сие внемлет и повинуется – сочетовается верным, аще не явится, что выше изображенных при себе имея, или в промысле, или что либо, и не хощет усердно и благопокорно исправитися, да отвержется.

2. Аще-ли же ремесленный, того распрашивать о художества его: не делает-ли каковых игрательных орудий, или устраяет каким образом табак, или из принадлежавших каковых игрательных орудий или устрояет каким образом табак, или из принадлежавших каковых орудий – для внешних церквей, или что делает под видом добраго фальшивое, в не праведное приобретение свое, и во обиду другаго. Что все таковое составляет погибель и самой совести противно, и охуждает пред внешними, чистую християнскую веру.

И еще, что либо огласитель посоветует в пользу душевную приходящаго, и себе пользует, и онаго, и когда умиленно покоряется всему, приемлется. Аще ли же, сопротив глаголет, да отвержется.

3. Аще ли же поселянин спросить: вольный ли, или господский. Аще вольный, нужно спрашивать в том селении, где он жительствует. Если в соседстве, или в том ведении, с кем они сообщены, в правление, подобные християне, и нет ли им какого притеснения от внешних, или от соседства. И если скажет, что есть подобные, и никакого притеснения не имеют, а посему сие остается благо. Аще ли же скажет, что он первый, в таком случае, следует объяснить ему внятно, что если, по принятии веры, какое будет притеснение, чтоб християнския веры ни в коем случает до смерти не предавать и не отступать, ибо вера християнская, по обете и по крещении, не терпит никаковаго примеса, и не приемлет никаковаго человеческаго оправдания, и что бы ни случилось, терпети до последняго издыхания, и прирещи слово Христа Спасителя: «аще кто отвержется Мене пред человеки, отвергуся его и Аз пред Отцем моим, иже на небесех». Впрочем испытывати, сколько возможно, о поведении его, как писано и о купцах.

 

[Belsiger]

4. Аще ли же господской, подобно спрашивать: первый-ли он хочет быть християнином у господина, или есть уже подобные, если есть таковые и не терпят притеснения, то благо. Аще же первый, прирещи тожде, что и выше писано: что уже господину повиноватся телесно, а веру блюсти до последняго издыхания.

И могущия быти от господина напасти: аще бы разграбление имения, или ранами и биенми всячески, подобает терпети, а веры не предавати, а отступству извета никаковаго церковь Божия не приемлет. И всячески не содержащие ея всецело до после до последняго издыхания, во веки погибнет, и паче всех нечестивых в гиенне огненней, безконечней муце предан будет.

5. Аще вольный, или господский, но не имеет собственнаго своего хозяйства, но еще зависит или от родитель, или от сродник, в таком спрашивать: от кого он зависит? Аще верный, то благо, аще ли же неведущий? Аще верный, то благо, аще ли же неведущий, тому объявлять, могущия случиться вышеписанные напасти. Аще ли же верные, не излишнее оных почестить вопрошанием. Кольми же паче более, не совершенных возрастом, которые ради малаго пострашения, и лишенные пищи от зависящих, могут от веры отступити.

А равно всех вообще вопрошати о житейском их промысле, как выше изображено.

6. Вообще всех имеющих, по своему закону жены, испытыв, как выше изъяснено, по правилу Апостола Павла, лице, распрашивать житие и нрав испытати, не беззаконно ли ее како либо имеет, или вводную, кроме своего закона, или от живаго мужа взятую, аще что таково явится, отнюдь без расторжения не приемлятся. Аще ли же сего несрящется, и явится, по испытании, совершенно вне всякаго зазрения, а веру православную вседушно во всем приемлет, тогда объявлять ясно и речевито. Что по крещении, может с супружницею своею, аще и единодомовно спребывати, но целомудренно, и кроме плотскаго совокупления. Понеже сим не брак отметается, но за разсыпанием руки людей освященных, на совокупление и деторождение благословения получить не от кого невозможно, кольми же паче, в рождении, молитвословия, и очищении, и четыредесятодневной молитвы, что все оное християнский закон истязует соблюдати, кольми же паче бедствие при возрасте детей и самим рождшим пред очима предстоит погибель.

И аще всему сему покоряется, да будет прият, аще ли же предлагается, да будет прият, аще ли же предлагает свое неможение, и нехотение да отвержется: не бо таковый отревается, но сам отбегает своего спасения.

7. И аще сии брачные имеют дети, оным советовать приходить во християнство вседомовно. Понеже дети им единоплотни: и кто бы ин паче родителей, оным был, доброжелаттельнейший ко всякому благоприобретению. Но что может быть вышше сего приобретения, еже паче тысящ злата и сребра, скороминуемаго, но еже возсияти душею, паче солнечных луч, и верно и истинно чаяти путем сим дойти царства небеснаго, и получити некончаемых благ, и наслаждения неизреченнаго, ихже око не виде и ухо не слыша, и на сердце человеку не взыде, яже уготова любящим его, и в няже желают ангели приникнути, и прочая.

И аще сим увещанием родители совосхитятся, и истиннаго добра, как себе, равно и детям своим, и ко исполнению приступят, сие благо и спасительно обоим. Аще же родители начнут сего отрицатися, то явственно знаменует таковых родителей слабоверие и не глубокомыслие о православной вере, и законе християнском, но креушесно внимающих.

Наипаче же, аще дети будут маловозрастныя и состоящия в совершенной и полной воле родителей, а они о приведении их в християнскую веру вознерадят, или пренебрегут, таковые и сами мал прибыток церкви принесут. Аще ли же будут имети дети превозрастныя, и доброе родительское предложение отвергнут и вознерадят о всяком их добром и преблагом совете, тогда сами они пагубу свою наследят, своему разсуждению последовавшии.

8. И еще подобно явственне изрещи, аще бы детем своим по крещении снискали, каковым либо и образом, брак, тогда они яко пагубу детем снискавшие отступством и блудом, весьма отнюдь от церкви Божия отвергнутся, и не приимутся в сообщение, во вся дни живота, дондеже не расторгнут беззаконнаго сочетания чад своих. И даже ни при кончине жизни, и по смерти такожде никаковыя помощи не улучат, ни погребения, ни поминовения.

Да и сие внушати весьма подобает, что, по проречению церковных учителей, послет Сатана антихрист свою прелесть провозглашать в горы и в вертепы, с бесы и с чувственными человеки. Которыя по Апостолу, поныряюще в домы, и пленяюще женчища, сиречь слабоумных и маловерных, шепчут, яко змий Еве, возможным быти браком составляемым и сих, хотящим воистину спастися, подобает всяко заткнув уши, бегати, яко истовых посланников атихристовых и губителей, и даже не внимати самаго перваго произношения гласа их, аще не хощут быти уловлени в таковыя пагубныя и мерзоския сети, аще слова их и мягки будут паче елея, но суть, псаломнику: стрелы душеубительныя.

9. Не женатым, такожде подобно, по прочем всем, что выше изображено, предъявлять, что за неимением священства и священников тайно совершителей, бракосовершения получить не возможно, ежели желает в православии единолично в целомудрии безженно жизнь провождать, таковый прият да будет, а инако – да отвержется. И еще внушать подобает явственно, если дрезнет, по крещении, приступит како либо к браку, тогда отвержен будет от церкви, яко вольный отступник, дондеже не расторгнет беззаконнаго счетания.

Понеже извещен был при самом первоучении, и не может притещи ни каковому извету о неведении, но будет самоосужден, но евангельскому гласу. От уст твоих сужду тя, рабе лукавый, и сие подобно неумолчат. Аще в таковом случае найдет внезапная смерть, ни каковыя помощи от церкви Божия не улучит, ни погребения, ни поминовения, но изыдет от жизни, яко язычник и мытарь.

10. Нужно и сие испытовати от брачных. Не в ведени или православной веры брачился и корчемствуя приступил к браку против совести, и сего ради крещение отлагал. Таковый совершенно должен быть отвержен, или да расторгнется как у предков содержашеся. Ибо сейнедалече отступства: понеже и до ведения православныя веры брачившиися, непопущаются на совокупление и деторождение, кольми паче сии корчемники, ибо от сих християнству мало приобретение, но паче тщета и плевелосеяние, ибо под сим вымышлением , мнился утаитися боговедения: непщуя вины о гресе.

11. И сие паки при оглашении всякому полу и возрасту, могущему разумети, внушати, неотрочно, подобает. Аще и по крещении начнет противное божественным правилам и церковному обычаю и учению содевать, без востягновения, что либо противное, сугубый ответ воздаст на страшном испытании.

Наипаче же, аще внушать будет, нынешняго времени лестцем и баснословцем противная мудрствующим и ко ослаблению християнской жизни ведущим, сугубая погибель срящет таковаго, ибо святое и православное, свято и православно, хранить подобает. И сохраняя в целости соблюдшим благочестие, благонадежно спасение, ибо нагое имя християннина, без справления християнскагопути, спасти не может едина мертвая вера. Но елика сила подвизатися исправляти повеленная и зачиненная церковию.

12.Со иноверными не сообщатися, ни в мале в чем либо, в вещех таковых, которыя вредят благочестию. Се же есть, ни в молитве, ни в ястии, ни в питии, ни в дружбе, ни в любви, ни в мире: иже в сих прельшаяся исходя им, чужда себе творит соборныя и апостольския церкви, и о сем запрещении много обрящеши в писании, идеже таковых в сообщении с иноверными в ястии и питии, со идолопоклонники сочетовает писание, паче же Дух Святый глаголавший в нем.

13. И не токмо со иноверными не сообщатися, которые по писанию инаго бога имеют, но и со отлученными от церкви, яко то с новожены, или бо по иному чесому отлучены от общества християнскаго. Более же вего отвергать наведших родителей детей своих на отступство и на беззаконное счетание, яко помощников противнику Христову и сводителей с спасительнаго пути в невозвратную погибель. Ибо сие несть осуждение и призрение братства, но общемыслие церковное, по завещанию Апостольскому, еже к Коринфяном (зач. 133 и 134).

 

[Belsiger]

14. Такожде подобно, отнюдь не творити, каковаго либо снисхождение (Маргарид. лист. 7). Аще в нечестии братия или сестры, и прочие по плоти сродники, аще бы и сами рождшии, не подобает ни в чесом сообщатися по Христову словеси, к вопросившем погребсти отца своего, к нему же отвеща Спас: остави мертвыя погребсти, своя мертвецы. Вяще же блюстися подобает задушных церемоний нечестивых с ними, родин, крестин, именин, погребения, поминовения и прочая их празднества – отнюдь в них быти християнам законопреступно, и даже на таковых ни своего хлеба ясти, и в браках их не каковаго участия не имети, а даже и не зрети (Маргарид. лист. 9).

Тщание же всеусердно прилагать о обращении их, яко единокровных, словом учения, собою, елико может кто, и инеми могущими, паче же делом жития своего образ показывати: весть бо добродетель хвалити и сопостат.

15. К никонианским церквам и монастырям идеже лежат мощи святых, или стоят чудотворныя иконы, отнюд входить на молитву не подобает, по апостольскому правилу,и прочим повелевающим бегать таковых мест. Не бо сие есть презрение. но паче почитание, понеже сим ихъявляется послушание учению онех Святых.

Священная бо бывша под властию ратных, предстают быть священна: яко же свобод порабощен. Ибо аще и все сие свято в себе, но оскверненному месту святости не подают. А таковым хождением кто-либо весьма немощную братию соблазняет, и наследят за сие обещанный жернов осельский.

16. Входя по какому либо случаю в мирские домы, зельно блюстися подобает покланятися иконам их. Первое, как развращенно, и по еретическому мудрованию, писанным подобно иных некрещеных малиовным, паки же поставляются по их вере, нарицаемые ими святые, от чего будет весьма совесть угнетати истиннаго християнина, аще и по совосхищению и недоразумению, но грех не мал чествовати неподобное.

17. Воскресные дни и прочие великие праздники господские и богородичные отнюд не тороговати, и не работати, и ничтоже не делати, корыстолюбия ради (Номоканон. правил. 159), кроме неизбежно нужнаго: яко приготовление пищи, и питание скота, ибо в таковые дни при добыте не токмо душевредно и пагубно, но и благословенное в шести днех сотворенное оскверняет.

18. В бани торговыя, весьма противно християнам ходить мытися. Первое, что всякие язычники сходятся, и сосуды их, из коих мыются, весьма скверны. В таком случае, летящие пары всюду входят всеми чувствы в человека, и может ли кто уверить, чтоб, при всяком опасении своем, не поглотил мыющийся из таковых сосудов воды и паров, носящихся, весьма поганых, что есть противно не токмо писанию, но и самой совести.

У предков же наших, еще воображено было, что и с новоженами, яко отступниками от Церкви Божия, не мытися купно.

19. Мужем, подобно и женам, немецких одежд и прочих развращенных, по плотолюбию и блудострастию, отнюдь не носити. Ибо сие правило и учение Святых Учителей весьма отрицает.

20. Власы стрищи, по обычаю християнскому, и паче же по завещанию Святаго Апостола Павла, повелевающему: мужу молитву деяти откровенною главою, еже по толкованию Златоустаго, знаменует сие: естественное покрывало власы, а не материальное, жене же, повелевающаго, естественное покрывало главы припокрывати материальною.

 

[Belsiger]

21. Аще кому случится шествовати в путь, должен непременно имети с собою святую икону и на ястие и питие своя сосуды. Ибо сие несть каковое человеческое предание, но написанное церковное учение, которое хранити вседушно подобает.

22. Воспоминать при оглашении и сие именно и речевито: что по многим местам сельских жительств, или где либо ни случилось, хощут християнство удержати в тайне – в противность евангельскому и церковному учению.

По крещении умздевают попов, дабы вносили их в книги с причащающимися. Детей крещают в случае смерти, относят на погребение, и дают на поминовение. Дают вклады в церковное строение, и на свещи и прочее, все себя явно дают ведати, что они во всем внешнех церквей сообщники и послушники, даже и в домы своя впущают с их святынею, и работою помогают для церквей.

И сие все великому рыданию достойно, и весьма евангельскому учению противно, и весьма близко совершеннаго отступства, и отречения православныя веры. Ибо Христос Спаситель явственно рече: «всяк убо иже исповесть Мя пред человеки, исповем его и Аз пред Отцем моим, иже на небесех. А иже отвержется Мене пред человеки, отвергуся его и Аз пред Отцем моим, иже на небесех». Не мните, яко приидох воврещи мир на землю: не приидох воврещи мир, но меч, и прочее.

Сему последует и всеобщее церковное учение, яко же Григорий Богослов в неделю новую временем таяся, и противу времени вероваше зане имяше держащие тя еретики, и бояся их. Мняшеся еретиком, равняяся и ты еретик. И паки Апостольское строгое отречение: кая (рече) часть свету ко тьме, верном ус неверным, церкви Божия со идолы, паче же Христу с Велиаром.

И все сие пришед во обычай, от глупых и безграмотных, нарицающихся наставниками. По славолюбию, и любоначальству, мшелоимству, раздравши на многия части, и уступая всякому всех скверном начинанию, для удержания, чтоб в другое какое согласие не отбегли. О! Необмыслимая беда, всему свету судити оставляю. Да воньмут с безпристрастием, могут ли вси таковые спастися: по всему еретики. Того ради, здесь еще повторю: говорить откровенно при оглашении, что все таковыя деяния совершенно христстиянства лишаю, и присовокупляют антихристу.

23. Молитися по уставу церковному неотрочно, и неотложно, на кииждо день, како вместно и можно, по состоянию человека свободнаго и имущественнаго, или подвластнаго и неимущественнаго. Ибо от перваго требуется всячески, соразмерно состоянию и свободе, исправлять, когда есть вечерня, тогда преже вечерню да помолится и потом ужина, а повечерянии, павечерня,и аще есть в доме грамотный человек, чтет по павечерне начало келейному правилу – еже есть 12 поклонов и 5 молитв, и проч., как изображено.

Первые християны, в видении еще существующих людей, молились за келейное правило нощию. Сколько обычно киийждо по благословению отца духовнаго. А восстав от сна по правилу 16, Апостола Павла, умывшеся, да молятся за полунощницу, и за утреню, и первый час, и потом с разстоянием времени. или не отходя за 3-й и 6-й и 9-й час и прочее до конца. И сие все исправлять непременно до обеда. Разве бы, каковый весьма нужный случай, и прямая необходимость, того исправить не позволила, и как повыше сказано койждо по своему состоянию, или молитвами или поклонами или псалмами, или могущия по уставу все части упомянутыя да исправляют.

Ибо аще лености ради или нерадения, оставит уставленную от церкви Божия молитву, таковый, по изглашению церковному, во тьме шатается. От чего сохрани Боже всякаго християнина.

24. В общем же собрании на молитве, подобает соблюдати первое: опрятно и умильно стояти, руце имея пригбение к персем, и паки необзиратися семо и овамо: вравне стояти. И вравне поклонятися.

Аще же случится что естественное – покашлите, или сморкати, и в том должно потщатися, елико мощно – с тихостию. Ибо от таковаго благочиннаго стояния, п случаю призрения внешних, славится Бог, и православное християнство прославляется: ибо весть доброе хвалити и сопостат.

25. Посты, по учению церковному и по християнскому обычаю соблюдать не отложно, и нужно, вси обязани хранити, яко то среды и пятки, когда нет праздника: ни от средних ни от малых тогда да никто же дрезнет дважды ясти, или с маслом. Ибо таковых преслушников, церковные учители и с распеншими Христа вчиняют.

Такожде и Святые посты: яко к Христову Рождеству, и к Святым Апостолам и Богородичный ко Успению. Особо же весьма да хранится святая и великая четыредесятница к Воскресению Христову. Яко десятина от всего лета. Понеже кроме уставленныя молитвы и поста, тщее имя християнства, не токмо спасение приобретает, но и сугубую погибель сострояет, по гласу Апостольскому: лучше бы не познати пути правды, и прочее.

 

[Belsiger]

К тому же и сие да не в забвение приидет: яко еже ясти что либо преже обеда и по обеде, и почитать безгрешием, яко же внешняя чада творят или друга ради пришедшаго поставляти некия снеди, ради лакомства, все сие християном не позволено, и в предках видимо сего не было. А что деется, от кого чрез законно и обычай, наследует таковый сам свою пагубу. Паче же и вящше, аще «непшует вины о гресе» сем, хотящим же воистину спастися и тещи по пути церковнаго учения и по образу предков, непотребно ревновати развращению. Но внимати вящше о времени, якоже рече Исаия Пророк: «оставлена будет дщи Сионя, яко семя в винограде, и яко овощное хранилище в вертограде».

И яко град обстоим, и таковая пророческая предсказания, что ино знаменует, но еже инкогда же бывшия тесноты и угнетения, и бед душевных. Еже послежде и с сам Спаситель назнамена рече: будет бо такова скорбь, яко важе не было от начала мира, ниже имать бытии, и сие не бо от телесной каковой беде знаменает, но по души, да не от нас сбудется в сие преплачевное время предсказание, отягчающихся объедением и пиянством, а потом и блудницы будут.

И сего ради вси православни, всяк род, и возраст всяк, о помощи и избавлении сих душевных бед и вредов, в злолютое сие время, да призывают незабвенно в молитвах со всеусердным и вседушным вниманием: святых мучеников и исповедников от лета … Иже показаша нам в лице всю прелесть противника Христова, и слуг его. И воистину, по писанию, ублажаемые, паче первых мученик. Ибо тии слуги, а сии самаго сына погибельнаго попраша, и воистину вси ангели ублажают их. И сия вина спасения нашего, яко показаша путь спасительный непреткновенен, и неблазен и благонадежден. Яко Павел епископ коломенский, начальник за християнскую веру или паче за Самаго Христа, божественнаго ополчения, и священно-иерей Логин-муромская слава, Аввакум ведоблий и проч.

Елико священническаго и иноческаго чина, и всех мужескаго и женскаго пола, и всякаго возраста: им же имена в книгах животных. Сильно вспоможение обрящет, кто в борьбе с прелестники, яко же искусом навыкшеи нам предаша все верне хранити.